په کندوز پوهنتون کې د بیتالمال د ساتنې او له خیانت څخه د ځان ساتلو په اړه دیني درس وړاندې شو!
د ټاکل شوي مهالوېش له مخې، د شیخ صاحب امیرالمؤمنین حفظهالله د فرمانونو د تطبیق په لړ کې نن د کندوز پوهنتون په مسجد کې د بیتالمال د ساتنې او له خیانت څخه د ځان ساتلو په اړه علمي او دیني درس وړاندې شو
دغه درس د کندوز پوهنتون محترم رئیس الحاج مولوي صاحب عبدالهادي همت له لوري وړاندې شو، چې د پوهنتون مرستیالانو، د پوهنځیو رئیس صاحبانو، استادانو، کارکوونکو او ګڼ شمېر محصلانو په کې ګډون کړی و
مولوي صاحب عبدالهادي همت په خپله وینا کې د قرآن کریم د مبارکو آیتونو او نبوي احادیثو په رڼا کې د بیتالمال د ساتنې، د عامه شتمنیو د مسؤولانه استعمال او له خیانت څخه د ځان ساتلو په اړه هر اړخیزې خبرې وکړې
نوموړي پر استادانو، کارکوونکو او محصلانو ټینګار وکړ چې د بیتالمال ساتنه د ټولو ګډ مسؤولیت دی او هېڅوک باید د عامه شتمنیو په اړه له بېپروایۍ، ناسم استعمال او خیانت څخه کار وانخلي
د کندوز پوهنتون رئیس زیاته کړه چې د بیتالمال ساتنه امانت دی او هر څوک باید د خپلو مسؤولیتونو په ترسره کولو کې د امانتدارۍ، صداقت او مسؤولیت احساس ولري
دغه علمي او دیني درس د دعا په ویلو سره پای ته ورسېد
