د کندز پوهنتون د نړیوالې علمي مجلې مهمه لاسته راوړنه!
د کندز پوهنتون د علمي څېړنو معاونیت د هڅو په پایله کې د کندز پوهنتون د اسلامي مطالعاتو او ټولنیزو علومو نړیواله علمي مجله
(KUIJIS) په یو شمېر معتبرو نړیوالو علمي ډیټابېسونو او معلوماتي بنسټونو کې ثبت او شامله شوې ده
یاده مجله په Google Scholar، Semantic Scholar، Dimensions، Crossref، Scilit، WorldCat او Research4Life په څېر نړیوالو علمي او معلوماتي بنسټونو کې ثبت او شامله شوې، چې دا چاره د کندز پوهنتون د علمي او څېړنیز فعالیت په برخه کې یوه مهمه لاسته راوړنه بلل کېږي
په دغو نړیوالو علمي بنسټونو کې د مجلې شاملېدل د پوهنتون د محترمې رهبرۍ د ملاتړ، د علمي څېړنو معاونیت او د مجلې د مسؤلینو د هڅو، د تحریري پلاوي د همکارۍ، د علمي ارزونکو، لیکوالانو او نورو همکارانو د ګډو هلو ځلو پایله ده
د مجلې په یادو نړیوالو علمي ډیټابېسونو کې شاملېدل به د کندز پوهنتون د علمي او څېړنیزو اثارو د لا زیات لیدل کېدو، لاسرسي او خپرېدو زمینه برابره کړي او د پوهنتون علمي فعالیتونه به لا پراخ نړیوال مخاطبین ومومي
همدارنګه، د کندز پوهنتون د اسلامي مطالعاتو او ټولنیزو علومو نړیوالې مجلې په نړیوالو علمي بنسټونو کې شاملېدل به د کندز پوهنتون د علمي او څېړنیز مقام په پیاوړتیا او په ملي او نړیواله کچه د پوهنتون د علمي اعتبار او شهرت په لا زیاتېدو کې مهم رول ولري .
